穷人，穷人，迭个年头，何里一个勿穷呐，何里一个勿是穷人呐？

白米卖到六十块洋钿一担，猪肉一块五角洋钿一斤，三角洋钿一棵黄芽菜，一角洋钿一盒洋火，从来呒没听到过。穷人，穷人，是个，做佣人个侪是穷人，做主人个个个侪是发财个啊？迭个年头，只有军阀，只有奸商，呒没良心个人，再会发财呀，我伲勿是迭恁介个人——迭恁介个三间破房子，一个月要四十块洋钿个房租。打仗前头，四块洋钿也没人要。真真是敲竹杠！迭恁个事体，再是欺负人个事体，迭恁个人，再需要人家去管教管教……

【随便翻翻，用上海话（吴语）书面语

注：“个”用作助词的时候读ek，在“个个”、“个人”里读ku，在其他情况下读kek或者gek】

是个，我用个佣人是一个穷人，我承认，必过我又没欺负伊。迭恁贵个伙食，伊一个人吃三个人个饭，我又没扣伊个工钿咯。打破脱我个物事，勿赔！还有人家帮忙，讲勿用赔。我倒要听听迭个大道理。

【注：“贵”读似“举”，然本字即贵，不作音译。物事读作mek-zy。】

呶，看呀，就是搭迭只一模一样个一只花瓶。还是五年前我从牯岭避暑回上海个辰光来海九江买个。伊要廿块洋钿一对，是我还了六块洋钿买下来个。用到现在，呒没看到打破脱一眼。我欢喜伊个样子，再特地当宝贝一样个带勒身浪向。伊拿挨个一只打勒粉粉碎！侬讲气勿气人？现在侬就是出十块洋钿一只，也没地方去买。我要伊照原价钿赔我三块洋钿，已经算是十二分个客气了。

现在个三块洋钿，值啥？ 抵勿到老早点个三角洋钿。照道理应该照市价赔拨我再对。必过我已经讲了只要伊赔我三块洋钿，已经讲出来个言话，我勿反悔个。如果讲连三块洋钿也勿赔拨我，是勿来赛个！

啊，侬晓得讲穷，侬也会讲侬是一个穷人，个么刚刚侬讲个侪是废言话！侬晓得大家侪是穷人了，还讲啥帮穷人想想？侬讲侬是一个穷光蛋，问一声，现在何里一个勿是穷光蛋？

我为啥勿好多讲？难道我连来海我自家窝里向讲言话个权利也侪没了啊？

废言话。挨个是我个铜钿，我欢喜何恁用就可以何恁用，人家管勿着个。